2016-17 Droogte in Patagonië verwoes skaap boerderye
Daar heers tans ‘n besonderse erge droogte in die suidelike helfte van Argentinië wat as Patagonië bekend staan. Die streek wat natuurlik baie droog is het net ‘n kwart van die normale reënval ontvang en boere het reeds hulle skaapkuddes verminder of heeltemal van kant gemaak.
http://www.tiemposur.com.ar/nota/124820-productores-de-santa-cruz-calculan-en-900-millones-las-perdidas-por-sequia
In die provinsie van Santa Cruz waar die beroemde gletsers van Argentinië ook gevind kan word word daar geskat dat daar hierdie jaar net die helfte van die lammers gaan oorleef as wat gebeur in ‘n normale jaar en baie boerderye staan op die punt van finansiële ondergang indien die reënval nie binnekort normaliseer nie.
Die skaapproduserende gedeelte van Argentinië, Patagonië, waarvan daar eintlik baie min bekend is vanweë sy klein bevolking en die relatiewe min verbruik van skaapvleis onder Argentynse verbruikers gaan tans gebuk onder die ergste droogte in 80 jaar. Lente- en somerreën wat normaalweg tussen September en November verwag word het hierdie seisoen heeltemal weggebly en dit na ‘n winter met besonders min sneeu. Die boere hier wat meestal wol en vleis produseer vir die uitvoer mark dui aan dat hulle tans net sowat 40% van die normale produksie kan lewer en dat daar groot kommer is oor die komende seisoen aangesien die natuurlike plantegroei hier lank neem om te herstel.
Die plaaslike regering het die area as rampgebied verklaar maar dit bring min verligting onder die huidige omstandighede. Normaalweg reën dit hier 200mm per jaar en groot gedeeltes het net 50 of 60 mm ontvang met geen verandering verwag in die nabye toekoms nie.
